Poñer o noso gran de area para a mellora social da nosa contorna apoiando a entidades que traballan para favorecer a persoas en situación de emerxencia ou exclusión social é unha das prioridades de Marineda City. Por iso, queremos abrir as nosas canles de comunicación, o noso blog e as nosas redes sociais, ás asociacións coas que colaboramos nos nosos dez anos de vida para darlles voz e difundir os extraordinarios proxectos nos que traballan para facer que este mundo sexa un pouco mellor. Empezaremos por contarvos o traballo que realiza a Asociación Poten100mos, porque a que non é sinxelo seleccionar a información á hora de redactar un bo CV?, ou saber cales son os xestos que teñen en conta as empresas cando te presentas a unha entrevista de traballo?
Desde 2019 a Asociación Poten100mos, en colaboración con Marineda City e a concellería de Benestar Social do Concello da Coruña, puxo en marcha o proxecto Impresiona, cuxo obxectivo principal é lograr o empoderamento e a mellora da imaxe persoal daquelas mulleres que se atopan en situación de exclusión ou vulnerabilidade e en procura activa de emprego.
O currículo para comezar
Este programa persegue tres finalidades: inclusión, sustentabilidade e concienciación social e empresarial. E consiste en tres módulos nos que, a través da voz de expertos, oriéntase a mulleres sobre os perfís profesionais máis demandados actualmente, ofrécese a información esencial á hora de encher un CV, ensínase cales son as actitudes correctas para presentarse a unha entrevista de traballo e proporciónase un asesoramento estilístico. A súa finalidade é axudar ás mulleres para sacarse o mellor partido para as temidas entrevistas.
En todas as sesións Impresiona participa un responsable de RRHH, de modo que as participantes teñen a perspectiva sobre como realizar unha entrevista directamente dunha empresa, tendo ademais contacto directo con ela. Ademais, cada unha das mulleres que participan no programa dispón dunha sesión de persoal shopping, na que se lle facilita roupa nova adecuada para as próximas entrevistas que obteña, en base a un asesoramento de imaxe personalizado.
En 2020 participaron nas sesións, que se imparten en Marineda City, un total de 110 mulleres, das cales o 47,1% acudiu a unha entrevista e o 31,3% asinou un contrato de traballo.
Gabriela Mendoza, orientadora laboral no programa Impresiona, recalca a importancia de preparar un bo CV: debe ser claro e conter a información correcta. Tamén incide na importancia de explicarlles que o feito de buscar emprego significa estarse a actualizar constantemente, sendo conscientes de que en calquera momento pode aparecer unha oportunidade.
É o caso de Cristina dos Santos, antiga participante do programa, que tras revisar o seu currículo vitae con Gabriela e envialo a empresas, recibiu 5 oportunidades de traballo! Tras un ano en paro antes de participar no programa, está a traballar para a empresa coa que fixo a primeira entrevista. 🥳
Unha imaxe non sempre vale máis que mil palabras
As circunstancias económicas fan que ás veces non sexa unha tarefa sinxela adecuar a túa imaxe persoal ás expectativas dunha entrevista de traballo. Isto mingua a auto valoración e autoestima e non nos deixa dar o mellor de nós mesmas.
Mariam Poghosyan, antiga participante de Impresiona, conta como ao longo das sesións Gabriela axudoulle a ver e valorar que estaba máis preparada e cualificada do que ela pensaba: “Ás veces necesitas que cho digan de fóra, ti mesma non o cres moito”. Ela tivo que reorientar as súas perspectivas laborais, enfocándose a empresas e redes sociais como Linkedin, que lle desen a oportunidade de postular a postos de traballo acordes á súa preparación e experiencia.
Pasar por este programa supón un cambio na actitude e estado de ánimo de moitas mulleres, conseguindo que saian con outra visión: “Emocióname moito ver como chegan as persoas e como se van”, incide Gabriela Mendoza. Dado que a intención do programa é preparar a unha muller para enfrontar un proceso de selección ou unha entrevista de traballo, os módulos achegan perspectivas distintas: “Os tres eran moi diferentes os uns dos outros e todos achegaban algo interesante, a verdade”, di Mariam Poghosyan.
Empoderamento e sustentabilidade, da man
No módulo orientado ao asesoramento da imaxe deste programa fálase de tipoloxías corporais, de como sacarse partido, de texturas, das pezas que mellor quedan segundo o tipo de corpo, etc. E esta sección foi a preferida de Cristina, xa que lle axudou a descubrir aspectos do seu corpo que descoñecía: “A min paréceme que o importante é a impresión que unha deixa á persoa que a está entrevistando”. Di que recomenda constantemente este programa na súa contorna, pois: “Sentinme moi cómoda con esta xente, puiden expresarme con eles. Volvería falar unha e mil veces dos mesmos temas”, e iso é o mellor dos agasallos.
A Asociación Poten100 mos realiza estas sesións como complemento aos seus itinerarios de emprego e desenvolvemento persoal; un elo máis da cadea na procura de emprego imprescindible para que as mulleres participantes teñan máis posibilidades e éxito na súa procura.
Se estás interesada, temos boas noticias. Actualmente estase desenvolvendo unha nova edición do programa Impresiona en Marineda City, na que aínda quedan 4 sesións que se imparten de 10 a 14 durante os seguintes días: 9, 16 e 30 de xullo e 24 de setembro. Para solicitar máis información ou inscribirte, chama ou envía un Whatsapp á Asociación Poten100mos no 604033321.
