Con motivo do Día Internacional da Paz, celebrado o 21 de setembro, quixemos recoller cinco títulos para transmitir aos máis pequenos da casa os valores de tolerancia e convivencia pacífica.
Os cativos son a nosa ferramenta máis valiosa para convivir nun mundo en paz. E os libros, o noso ben máis prezado para ensinarlles a ser mellores ca nós. Estes son 5 libros para mostrarlles que é a paz e por que é tan importante para nós.
Con prólogo de Yoko Ono e ilustracións de Jean Julien, famoso pola súa ilustración Peace for Paris en apoio á cidade durante os atentados de 2015, conta a historia dunha pomba que viaxa polo mundo levando a súa mensaxe de paz a paxaros de todo tipo. Este proxecto iniciouno Amnistía Internacional en Reino Unido. E pareceunos unha idea preciosa.
Érase unha vez un belo país onde dous reis asentaron cadanseu castelo nun extremo. Os dous eran fermosos, e ambos os reinos convivían felices e en amizade. Pero un triste día os excrementos de dous paxaros caeron sobre o nariz dos reis. Ambos riron, pero deste feito tan parvo empezou unha terrible guerra entre os reinos. Este libro de Éric Battut representa á perfección o absurdo da guerra, e as ilustracións son incribles!
Sabías que hai moito moito tempo na Terra só había elefantes negros e brancos? Uns vivían nun lado da selva, e os outros no contrario. Un mal día enfadáronse e decidiron matarse entre eles, e así foi como se extinguiron. Pero anos e anos despois, apareceron sobre o planeta elefantes grises, os netos daqueles que non crían na guerra e se esconderan anos atrás. Nunha historia sinxela, David McKee traslada as mensaxes máis importantes nesta conversación. Un must have moi claro.
Este libro é unha mensaxe de esperanza. Ensina a diferenciar a luz entre as ruínas, e lembrar que o libro e a palabra son ferramentas moi poderosas contra a guerra. A protagonista comeza narrando como despois da guerra a súa familia quedou sen casa. E cando se foron a vivir ao coche, a vida converteuse nunha viaxe! As ilustracións teñen unha potencia alucinante e a historia traslada unha mensaxe chea de tenrura na tristeza. Recomendamos este libro ao 100%, porque ensina a celebrar a vida e a compaña dos teus.
Conta a historia de Kenan, un neno que adora o baloncesto. Pero o seu país leva moitos anos en guerra cun territorio veciño, e un día resulta ferido na perna cando atacan o autobús que o levaba a un partido. As ilustracións en gris de Tobias Krejtschi complementan á perfección a narración de Karin Gruss, que pide prestada a voz dun xornalista para contarnos esta historia. Este libro ten un enfoque moi realista, e pola crueza coa que traslada a vida nun país en guerra, recomendámolo para nenos a partir de dez anos.
Se che gustou algún, podes botar un ollo na Libraría Santos Ochoa e na planta 2 de El Corte Inglés.
