A Fundación María José Jove inaugurou onte no Business Center de Marineda unha exposición que organizaron coincidindo co fallo do VII Premio Internacional de Arte Fundación María José Jove, certame ao que se presentaron case 900 participantes de Europa e Latinoamérica, principalmente.
Nesta edición, a entidade decidiu dar un xiro á posta en escena do mesmo, utilizando un espazo máis alternativo que facilite a visibilidade da obra nunha contorna máis adecuada. En total, ocuparanse 1.700 m2 industriais.
Os contidos da mostra son as 15 obras finalistas da presente edición, xunto con outras finalistas de edicións anteriores de artistas como Juan López, Núria Güell, Cristina Garrido, Pomba Polo, Miguel Anxo Tornero, Almudena Lobera, entre outros.
A exposición pode visitarse desde o 4 ata o 29 de xuño, de luns a sábado, en horario de 17 a 21h. Ademais, os días 15 e 22 de xuño, de 12 a 13.30h, realizaranse dous obradoiros para familias nos que, de xeito lúdico e creativo, traballaranse os aspectos artísticos presentes na mostra.
O VII Premio Internacional de Arte Fundación María José Jove ten como obxectivo o fomento e difusión das artes plásticas e diríxese a persoas de ata 40 anos de calquera nacionalidade e lugar de residencia. Trátase da sétima edición dun certame bienal de ámbito internacional e dotado con 21.000 euros: 12.000 euros para o gañador, cuxa obra pasará a formar parte da Colección de Arte Fundación María José Jove e 9.000, para adquisición doutras obras presentadas ao certame.
